السفر والهجرة

الهجره العشوائية لامريكا 2021

الهجره العشوائية لامريكا 2021
بدء من اليوم الموافق 2 اكتوبر وسوف تنتهي يوم 5 نوفمبر الساعه 6 مساء بتوقيت القاهره. وسوف يتم الاعلان عن النتائج يوم 5 مايو 2020 فى تمام الساعه السادسه بتوقيت القاهره.
­­­
 اولاً / التعريف بالهجرة لآمريكا
الهجره لامريكا مقدمة من الخارجية الامريكية وبتفتح كل سنه فى شهر اكتوبر وبيستمر التقديم لمده شهر كامل من وقت فتح باب التقديم وبيختاروا 55 الف فيزا على مستوى العالم وكل دوله ليها حصه من المكسب يعنى بيختاروا من مصر 4800 او 4500 او 4300 وهكذا يعنى كل سنه بيكون فيه حصه محدده لكل دوله في الفوز ولكن الاعداد اللى كتبتها دى بتكون لمصر فقط وهكذا للجزائر والمغرب والمانيا والسودان ده على سبيل المثال، لكن اى دول تانية بيكون ليهم اعداد مختلفه فى الفوز او حصه مختلفه. وانا قولت ليك فوق خليك صبور لان انت بتقدم فى اكتوبر والنتيجه بتظهر فى شهر مايو .. والسفر بيكون فى سنه القرعه يعني القرعه اللى هتشتغل هتكون قرعه سنه 2021 يدينا ويدك العمر .. انت بقى هتسافر فى السنه دي.
­
 ثانياً / خطوات التقديم علي الهجرة
1- التقديم بيتم من خلال الموقع ده www.dvlottery.state.gov
الموقع ده الرسمي من دائرة الهجره فى امريكا يعنى مش اى موقع تسجل فيه، لان هتلاقى مواقع كتيره كلهم غلط او نصابين او بمعني اصح Fake واعلانات ويتبعتلك على الاميل. خلي بالك.
2- هتلاقي هنا شرح التقديم الجديد https://youtu.be/Aey2ckDKfS8
­
3- المطلوب فى التقديم صورة حديثه مقاس 5 ف 5 وحجمها اقل من 240 كيلو بايت، تتصورها فى اى استوديوا وتخدها على فلاشه او ميمورى كارد او على اسطوانه علشان انت هتحتاج تعملها ابلود على موقع التقديم بتاع الهجره وقت التقديم.
­
3- تعليمات الهجره 2021
هتلقيها على الموقع بالخارجية الامريكية بكل اللغات
­ ­
 ثالثاً / اسئلة مهمة جدااا والاجابة عليها قبل التقديم
1- شروط التقديم في الهجرة العشوائية لامريكا انك تكون مكمل 12 سنه من التعليم، طيب لو انت اقل من كده يبقى هتحتاج شهاده خبره على الاقل سنتين تتوافق مع قانون العمل الامريكي وده للناس اللى معاها ابتدائى او اعدادي او مش كملت تعليم وهتلاقى شرح هنا كامل للجزء ده هنا https://youtu.be/QzhUzAQjqD0
­
2- فى ناس كتيره بتسال هو لازم يكون معايا لغه او لازم اتكلم انجليزي، لا طبعا غير مطلوب يكون معاك لغه او شهاده زى الايلتس او التويفل.
­ ­
3- تعبئة الاستماره باللغه الانجليزية، علشان ناس كتيره جدااااااااا سألت على الجزء ده، يعني انت مسافر امريكا وبتقدم فى هجره هتملئ الطلب بتاعك بالعربي ازاى يا جدع.
­ ­
4- متحولش تكدب فى اى بيانات وانت بتملئ الاستماره علشان لو فوزت وانت كدبت عليهم وحولت تصلح الكدبه دى فى استماره الفوز هتتصلح ولكن لما تدخل السفاره وقت المقابله هتاخد رفض وحصل مع ناس كتيره جدااا ، على سبيل المثال كان فيه ناس مولوده فى الجزائر وعايشين فى السعوديه ولما قدموا نسوا وكتبوا انهم مولودين فى السعوديه .. ولما حالفهم الحظ وفازوا صححوا الخطا ده فى استماره الفوز وللاسف وقت المقابله اترفضوا والقنصل فكر انهم كدابين. وحاله تانيه تكون انت متزوج ومعاك اطفال وتقدم انت وزوجتك بس من غير الاطفال .. ولما تفوز تضيف معاك الاطفال فى ابلكيشن الفوز .. للاسف بتدخل السفاره وبتترفض لانك كدبت عليهم فى الاول .. نخلى بالنا وفى قصص كتيره للرفض.
­ ­
5- كتير ناس بتسألنى احنا فى سنه 2019 وانت بتقول هجره 2021 ازاى ؟
التقديم بيكون لسنه 2021 بس بيكون قبلها بسنه ونص علشان هيه اجراءات ووقت وارقام وفيلم طويل هما مقسمينها كده، #ركز هنا انت بتقدم في شهر اكتوبر فى سنه 2019 وبتنتظر النتيجه فى مايو 2020 وبداية المقابلات للفائزين فى اكتوبر 2020 ونهايه المقابلات 30 سبتمبر 2021.
­ ­
6- الحاجه الجديده والجميله فى التقديم ان التقديم بقى بجواز السفر لانه هيقلل عدد المتقدمين وهيكون فى حظ كبير لاغلبيه الناس .. لان كان بيقدم من مصر حوالى مليون و 200 الف. المهم ان التقديم فى الهجره هذا العام لازم بجواز سفر يعنى لازم كل متقدم يكون معاه جواز سفر ساري مش منتهى علشان يعرف يشارك فى التقديم .. غير كده مينفعش ..
­ ­
7- بالنسبه للاخوة اللى من فلسطين لما يجى يقدموا التوزيع الجغرافى بتاعهم حيكون واحد من التلات اما من غزة او الضفة او سكان إسرائيل فاللى من الضفة الغربية هيختار الاردن واللى من قطاع غزة يختار مصر واللى من فلسطينيو إسرائيل يختار إسرائيل.
­ ­
8- موضوع #الصوره اللى محيره الناس معاك صوره قديمه ينفع تقدم بيها بس الاهم ميكنش ملامح وشك متغيره او تتصور جديده برحتك، وده شرح كامل عن الصوره انا شرحت فيه كل شئ وهتلاقى لينك مخصوص لأمثلة الصورة الصحيحة.
كيفية تعديل صورة الهجرة العشوائية لآمريكا – الجزء الاول
https://youtu.be/6erNWLvKSrQ
كيفية تعديل صورة الهجرة العشوائية لآمريكا – الجزء الثاني
https://youtu.be/1w8PYkoDsHU
الامثلة الصحيحة والخاطئة لصوره الهجره
https://youtu.be/053taxPAiGI
كيفية تعديل الصورة عن طريق برنامج الرسام
https://youtu.be/zckHVQX-nKw
حل مشكله الاداه Photo Tool الجديد 2020
https://youtu.be/mYApBhXelz4
­­ ­ ­
9- ممنوع التصوير بالنظاره والتقديم بيها حتى جواز السفر الامريكي الاول كان مسموح بيه الصورة بالنظاره ولكن الكلام ده اتغير تماماً من نوفمبر 2016.
­ ­ ­ ­
10- الناس اللى معاهم اطفال لازم تضيفوا كل الاطفال حتى لو مش عايزنهم يسافروا معاكم لازم تضيفوهم .. ولو عندكم اولاد فوق ال 21 سنه مينفعش تضفوهم وهما شرحين الجزء ده فى استماره التقديم للى بيفهم انجليش هيلاقي الشرح تحت السؤال ولو ضفتوهم القنصل هيرفضهم فى المقابله وده حصل مع كتير .. فريحوا دماغكم وبلاش تضيفوا حد فوق 21 سنه اختصارا للتفكير والفلوس.
­ ­
11- الاولاد اللى مولودين فى امريكا ومعاهم جنسية امريكية مش محتاجه تضيفه معاك فى ابلكيشن الهجره لانه هو اصلا امريكي، يعنى انت هتدخل عدد الاولاد اللى معاهم الجنسية المصرية فقط واللى معاك جنسية امريكية ده باشا مش هينضاف.
­ ­
12- بالنسبة للعائلات يعنى زوج وزوجه واولاد لو حد فيكم مش عايز يسافر ورافض مينفعش تقدموا اصلا لان لازم كل الافراد تنضاف فى طلب الهجره ومتقولش اقدم لوحدى سواء انتى او هو لان الموقع بيطلب صورة الزوج والاطفال والبيانات .. الحل فى الجزء ده تقدم سنجل وتسافر لوحدك. بس فيها ريسك كبير ان السفاره ترفضك يوم المقابله يعني الموضوع معقد بجد.
­ ­
13- الشخص اللى متزوج اكتر من زوجه .. الحل انه يقدم بزوجه واحده والاولاد منها غير كده مينفعش .. والافضل تقدم باول زوجه فقط.
­ ­
14- السؤال #السادس وناس كتيره بتسال عليه في التقديم لانه بيتكلم هل دولتك مؤهله فى التقديم ولا لاء ؟! عموماا المصريين كلهم مؤهلين هذا العام وكل الدول العربية وده شرح بسيط >>> لو انت مولود فى مصر وعايش فى مصر او مولود فى مصر وعايش فى اى دوله .. هتسيب السؤال زى ماهو ومش هتجاوب عليه، لان التقديم بيعتمد على بلد الميلاد مش الاقامه ولا الجنسية.
­ ­
15- نقطه مهمه جداااااا لو انت بتقدم فى مكاتب كل سنه ونويت تقدم السنه دى لوحدك ياريت تروح للمكتب افضل علشان ممكن المكتب يقدم ليك لوحده وانت متعرفش يبقى انت هتقدم لوحدك والمكتب هيقدم لوحده ويبقوا كده طلبين هيترفظوا وتخسر فى الهجره.
­ ­
16- الصورة للسيدات والبنات .. عادى جداا تتصوروا بالطرحه ولو عايزين تحطوا ميك اب عادى بس ياريت مش تغيروا ملامحكم علشان لما تتخدلوا السفاره ميكنش فيه فرق واضح. طبعا اى ست بتلبس نقاب لازم تتصور بطرحه. ممنوع النقاب.
­ ­
17- الاطفال الرضع .. متقلقوش من الصوره انتوا بتمسكوهم بأديكم وتصوروا الوش فقط بس وحولوا تفتحوا عنيهم ولو مش عرفتوا عادى جدااا لان دول سنهم صغير ومش مطلوب منهم صوره مواصفات زى الناس الكبيره.
­ ­
18- موضوع الجيش للشباب لو انت عارف انك هتلبس جيش يفضل مش تقدم الا لما تخلص او لو انت عارف انك هتخلض بعد انتهائ الهجره اللى بتخلص فى شهر 9 يبقى مش تقدم اصلا ولكن لو انت اصلا فى الجيش وهتخلص بعد ظهور النتيجه بكام شهر يبقى قدم من الاخر انت اللى تحسب وتعرف تقدم ولا لاء.
­ ­
19- لازم لما تقدم يكون عندك بريد الكتروني او اميل على الياهو او الجميل او الهوت ميل ولو مش عندك ده شرح ازاى تعمل اميل https://youtu.be/ryLJGwZLYNQ
­ ­
20- هتلاقى هنا الاجابة على اهم الاسئلة قبل التقديم من اعضاء الجروب
https://youtu.be/t0q6-LIt_vY
22- لو عايز تعرف اكتر عن الهجره ممكن تدخل على اللينك ده هتلاقى شروحات كتيره جداااا http://www.youtube.com/c/TravelSquare/videos
­ ­ ­ ­
21- اما لو عايز تعرف خطوات ما بعد الفوز، هتلاقى هنا سلسله كامله هتنفعك
https://www.youtube.com/watch?v=dT7owe8JblA&list=PLlChAP9SNn9IKZuOM9xC5jDnwj8AO-wHD
­ ­ ­ ­

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق